Related Posts with Thumbnails

Pages

2010年2月9日

Flight!與「玫瑰痤瘡」的抗戰!(後篇)

前篇在此



帶著醫生紙,我四處求診。


 


試過為著方便就腳──事實是也沒有多方便──去找了一位在屯門的皮膚科醫生;後來在she.com看到了同病網友,說在中環的曾偉之「醫生」很好,又跑去看了。我之所以用引號括著醫生二字,因為橫看豎看,曾先生該是位商人、生意人,多於似位醫生。他不但未能視診後便知道我是何種病(屯門那位亦不能,不過算啦,他診金便宜),病人坐下來不到三十秒便下送客令,病歷,都只寫在一張note上,收費昂貴(公司保險那HKD500只能小補),重點是:他醫不好我呀!看了個多月的病,我的紅疹沒有減退過,癢及熱的徵狀亦沒有改善,我的忍耐到達極限!


 


除了西醫外,中醫我也找過。我去看了屯門位元堂的那位中醫,什麼蛇皮、蝗蟲皮也喝過了,除卻嘔心一無作用,還得天天煮藥天天喝。也不提了。


 


轉戾點發生在我遇上由Mr. K同事介紹、聽說在荃灣區很「響朵」的葉褀焜醫生。他不是皮膚科專科醫生,可是我看開了,是專科又怎樣?快兩個月了,我看過的一號二號不都說是專科?哪個說好我都要試試看!


 


第一次預約了前往,等了快一小時。第一印象是:囂張、高傲。我依舊沒有告訴醫生我是什麼病(在我心裡,其實把這個當成對醫生的第一個考驗了),在視診後他自信而堅定地說:


 


「不知道妳之前看過的醫生怎麼說,也不知道妳有否聽過這個病,妳患的是一種名為『玫瑰痤瘡』的病。不是暗瘡,不是敏感。當患者感到熱的時候,例如做運動、曬太陽,熱力會令皮膚血管擴張,臉紅發熱,但不同於常人,發熱後自己不懂得降溫,再下一步就會長妳現在這種痤瘡了。」他說得很慢很慢,跟從商的曾先生大相徑庭。


 


他是第一位醫生能在第一次視診後便能主動告訴我正確的病名。人真奇怪,一句話便能改變了一切,包括我對他的評價:那不是囂張、高傲,那是自信的表現。


 


「這個病,是不能根治的,只能從各方面壓抑、改善。跟著下來我會...」


 


雖然我從網上已得知這是不能根治的病,但從一位我信任的醫生口中說出來,心情迅即掉進谷底,回想過去那兩個月看了一個又一個的醫生,每天吃十多二十粒藥丸的日子,定時定刻到醫生處呆等上句鐘覆診,臉上又癢又燙得睡不著,只能忍受、控制著自己心情不要太壞,亦不能亂哭,因為一哭臉就更燙更紅了!現在他說「不能治」,那我如何是好?太難過當場便哭出來了。


 


自信滿滿的醫生大概沒有怎麼試過有病人在他跟前痛哭,很明顯是嚇了一跳!他轉而問我有否抑鬱病例之類的,我心想再這樣下去,我快有了。


 


那天談了快半小時,他不厭其煩地說了好多次我一定要戒口,又給我一張小紙張,上面寫著:


 


· 有殼海鮮類:如蝦、蟹


· 果仁


· 含人造食素:如咖哩、叉燒


· 菇類


· 耳類:如雲耳、木耳


· 水楊酸類:如牛丸、貢丸


· 酒精類


 


以上全部不要吃!切忌讓自己體溫過熱,洗澡水不能太熱,不要泡溫泉或熱水浴,不要吃火鍋,不要做桑拿浴,不要做太刺激的運動,最重要的,不要吃辛辣的東西,酒千萬不要碰。帶著這許多「不要」及一大包抗生素,離開時我前所未有地覺得有希望。


 


下來,我耐心地吃藥。他的藥吃了不到一星期,我的病情明顯地有改善──不那麼紅了,不那麼癢了。只是那些藥會使我發胖及水腫,算了,那也是沒有辦法的事。前後共花半年,一直不停吃藥,到後來慢慢的減份量到最後,我終於不用再吃藥了。


 


 


以下是有關病發期間的一些心得:


 


· 不要再用雜七雜八的保養品!我自己都只用Physiogelcream lotion,在屈臣氏、萬寧及藥房有售,洗臉的話是無印良品的敏感肌用潔面泡


· Mask、精華素、facial 諸如此類能不做就別多事了


· 只用冷水洗面,冬天亦如是


· 在發病時,我會先把水放進雪櫃(非冰格,我怕太冰會凍傷皮膚),覺得臉太熱了就以雪水洗洗


· 承上,也可買冰袋,用毛巾包裹以冷卻發熱的臉頰


· 在辦公室上班的請留意自己的坐位會否太熱,我在桌上永遠有一把USB小風扇,吹著臉頰也舒服點


· 時時刻刻注意體溫,誇張點說,這是一場體溫之戰!


· 不要戴口罩,只會紅得更厲害


· 別哭,哭會令臉更紅更燙


· 發病期,戒牛、辣、酒,這三種東西最能令病情惡化


· 最後一點,找尋自己相信的醫生,耐心地吃藥,因為藥都不是一時三刻立即見效的


 


 


今天,我可以吃火鍋(只要不太近鍋側),好好地控制體溫地泡浴也是OK的,辣我真的戒不來但現在吃也沒事,酒的話一定要少喝,份量少是還可以的,但一喝多了臉會發滾且久久不退。總的來說,我算是正常人了。


 


下面兩圖,左邊是087月,只餘一點點紅(我沒有上胭脂);右邊是101月,已完全看不出來了。(突然有點不好意思貼自己的大頭照...)



 




這是一條很長的路,過程中你會聽到很多人不同的意見,諸如看那個中醫好,吃些什麼好,讓你拿不定主意;亦得不到太多諒解,因為這不是有名的病;康復的過程很慢很慢,也未必見效,還說不定會有副作用,似我,臉腫如豬頭。有幸,我跟葉醫生(的藥)夾得來,但我也聽說過有網友在我介紹下去看葉醫生卻未見成效,anyway,葉醫生是有耐性及細心的好人,就是他醫不好你,多聽一些意見也是好的。下面是他的資料:


 


 


葉祺焜醫生


 


地址:荃灣青山道298號南豐中心 9 949室(荃灣地鐵 A 出口)


電話:2417 3883


星期一至五:上午九時至一時/下午三時半至七時半


星期六:上午九時至下午二時


星期日及公眾假期:休息


 


必須預約!(我目睹過他不接walk in客人)


 


*****


 


回應下面那位網友,我放上這張09年冬天拍下的照片,這是我在完全沒有上粉底的情況下拍的:


 



 


*****

回下面留言,我現在在用這套。CREAM,底霜(防曬必須做好)及粉底。





81 則留言:

  1. 見到有姐妹有e個病好返, 真係替你高興. 我都有e個病8年, 已經生到成面瘡, 仲係好大粒, 無膿頭又好鬼痛個d. 中醫西醫都睇過, 食藥食到胃有事要入醫院, 真係好灰. 最近又再山洪暴發, 成面又紅又有大瘡, 街上嘅人都用d奇怪眼光望你, 公司同事又問你做咩攪成咁, 叫你唔好亂食嘢, (其實我差不多食素咁濟), 唉~~~根本佢地唔會明你有幾辛苦
    [版主回覆02/11/2010 11:37:00]係,我都係幾乎食素咁濟,到你真係真素,d人又會話你唔夠營養。我覺得係側邊既人指手畫腳好唔負責任,佢地又冇真係study過食咩係好食咩唔好,就亂咁比評語,跟本唔係真係關心個患者,似發口痕多d!!
    你既case...要唔要試下睇下我講個醫生?唉,不過都係人夾人架咋,叫做多個希望,聽多個意見囉!

    回覆刪除
  2. 我以前小學時期同妳差唔多。又係一聽到可以醫斷尾就去睇。食咩可以好又試食。都食咗D奇怪野。連打針都試過打大腿同身後面。不過最擔心唔係我自己而係我阿媽。用咗佢好多錢。都無機會報答佢。唯有自己保重身體啦。
    [版主回覆02/11/2010 11:35:00]有時有d野係自己保重都冇用,要黎要病都唔知點解,我覺得似係命多d...

    回覆刪除
  3. 我都有打算去睇, 等下次m嚟時去, 因為個時爆得最勁. 希望夾到啦, 真係為塊面心力交瘁.
    [版主回覆02/11/2010 14:26:00]我明白果種無力感,覺得無人可以幫到自己...
    唉,其實我好怕睇醫生,尤其係睇新既醫生,要將病歷重新講一次,又要試藥...雖然最後可能都係白做,但係唔試過唔知work唔work既,的起心肝去睇下佢囉!
    要報告進度wor!

    回覆刪除
  4. 其實我情況比你更差,但沒有癢,可是很紅,幾粒紅的聚集一起,只聚集在兩面頰,面積很大!!! 我只用蜜糖皂或簡單番梘.但我有感情況愈差!不知葉醫生每 次 收費多少?會不會有強烈副作用呢? 你可否推介一些不太昂貴的洗面品呢? 我想知道實際要戒什麼呢? 拜託!!!!!
    [版主回覆02/12/2010 11:11:00]葉醫生收費係計佢開幾多日藥比你,一星期好似大約三百幾元,但我估要視乎佢開咩藥。係呢方面佢幾好相與架,因為佢唔係專科我唔可以claim五百蚊,只可以claim到275,佢就分開兩星期藥比我,下個星期佢就唔洗見醫生,直接攞藥就得。我本人對佢既藥的副作用係發胖及水腫,比起爛面唔算強烈囉,就先打左電話去問佢,因為張戒口紙我唔見左,發病期唔食得既野如下: 有殼海鮮類:如蝦、蟹 果仁 含人造食素:如咖哩、叉燒 菇類 耳類:如雲耳、木耳 水楊酸類:如牛丸、貢丸
    我而家用無印良品的敏感肌用潔面泡洗臉,60蚊左右,我只係晚上要卸妝先洗,我朝頭早只用清水洗面。亦推銷Physiogel出既cleanser,係萬寧買大約都係幾十蚊。
    希望幫到你!加油丫!

    回覆刪除
  5. sis~你好積極同努力去改善d皮膚 見到你好返晒~我都覺得開心^^ 因為我都有lee個可恨的皮膚病~ 但係我冇去到你咁勁~~ 希望你可以一路keep住唔再發同埋皮膚好啦^^ 請教下  你依家用咩洗面 (日頭會用咩)(夜晚用咩) thx!
    [版主回覆02/12/2010 11:12:00]我而家用無印良品的敏感肌用潔面泡洗臉,60蚊左右,我只係晚上要卸妝先洗,我朝頭早只用清水洗面。亦推銷Physiogel出既cleanser,係萬寧買大約都係幾十蚊。
    丫!如果我放假無化過妝,我都只用清水洗臉架咋!

    回覆刪除
  6. 震驚 x 2!!!!
    震驚一:原來你都識葉祺焜醫生﹗睇黎佢真係好出名,我都睇過佢一次,就係做左份工大約兩年左右,我雙手忽然不斷脫皮,好似主婦手咁,超樣衰﹗跟住一個同事介紹我去。佢收費好合理,而且一次就醫好左,仲叫我好返就唔駛返黎復診,真係有心醫人唔係呃錢囉。(同埋我覺得佢好nice架,佢唔係我公司專科panel doctor冇得claim,佢就專登寫張普通睇病的,等我claim一半都好。)
    震驚二:你第一次放大頭相仲要望實個鏡頭﹗我以為你以後都只會放掩掩揚揚約隱約現撲朔迷離令人有好多想像空間的相,哇,好surprise﹗仲要輕托香腮,小姐你想電死人咩﹗
    [版主回覆02/12/2010 11:34:00]咁橋!你住咁遠都去荃灣睇佢?我第一次去睇佢好夜,等等等到成八點先見到佢,可能因此佢面口唔係幾好啦!不過之後見佢佢都好nice,仲笑我第一次黎好激動tim...皮膚既病好麻煩,醫得好就真係開心!佢知道我公司只claim到HKD275就特登分開兩星期藥,一星期睇病+藥,一星期攞藥,係好好相與!而且係佢主動叫我唔洗再覆診,真係唔係呃錢既生意人!
    哎,你唔好笑我啦,兩年前既相搵唔到睇到皮膚但唔係唔望鏡頭...其實我都幾唔好意思自己貼自己既相,好似好尷尬咁...

    回覆刪除
  7. 好多謝你詳盡仔細的解釋!我想問你食了多少次藥,總共用了多少錢看葉醫生呢?前後用了多少時間? Physiogel的cleanser,是否有助舒緩病情呢? 你還用了什麼有效的護膚品呢?我實在有太多疑問,THANK YOU VERY MUCH!!!
    [版主回覆02/12/2010 14:24:00]前後共食左四個月藥,沒算過共用多少錢,因為幾多錢都要比佢洗架啦!!大約每星期報到一次放底300-350左右。
    Cleanser無助病情,只確保不會敏感似免屋漏兼夜雨,除了用physiogel 的lotion或cream(夏天lotion冬天cream)沒有用任何護膚品,年中慳唔少,所以比丫葉醫生既錢當係預支未來既護膚品錢,哈哈!

    回覆刪除
  8. Hello Miss K,
    I am a rosacea sufferer, and I have quite a lot of tons "small pimple-like things" on my forehead, and occasionally on cheeks. Yes, the cheeks also appear pink very easily. : (
    I want to ask if what pills you took from Dr Yip. Like you, I have been seeing different doctors, even the specialists in public hospitals.
    And, now, do you still have small pimple-like things on face?
    Your case really cheers up many of the rosacea sufferers !!!!
    [版主回覆02/20/2010 17:37:00]抱歉現在才回覆,因為我一直在找之前葉醫生的藥,我找到曾先生開的但找來找去就是不見葉醫生的...真的抱歉我不知道自己吃下了什麼...Orz。
    嗯,現在沒有小瘡了,我去找了一張沒有上粉底的照片放大給你看,請看上圖。不要放棄,不要灰心,去試試看葉醫生吧,初期我也要不停的試藥才試到適合自己的。

    回覆刪除
  9. Dear Miss K,
    Thanks very much for your effort!!! In fact, I have finished several months of doxycyclin, and it seems that I flush less often, but still, those small pimples are quite annoying. : (
    Thanks for uploading the recent photo! Your skin looks very good!! So envy you!
    Perhaps I have to watch my stress more carefully. I am a teacher, and my skin gets better and worse from time to time. Thanks for your advice as stated here in your blog. In fact, I skip many food already, like seafood, spicy, hot food, cheese, milk, tomatoes... the list can't be exhuastive!
    But I really feel very happy that you are brave enough to share your experience with us, rosacea sufferers. Keep your good skin, and hopefully mine will get better soon!

    回覆刪除
  10. 我都有呢樣野,都係係葉e生度睇.佢都唔錯既,睇佐差不多半年了 依家都好得7788,但早幾日食佐咖哩,搞到又無拉拉紅紅地,本來係停藥,但仲要食多幾個星期,由於事發得太突破,係夜晚自己都偷喊,去睇果d,我都禁唔住自己,喊住講唔想再食藥 番到屋企唸番,自己好傻同好魚
    [版主回覆03/08/2010 16:06:00]我明我明!!果次自己手痕,因為用左好耐Physicogel好悶,就買左隻BB用既Cream黎用,貪佢香,仲我諗:連BB都用得又話防敏感,我實得啦!點知就係唔得!!一搽上左面,唔夠十分鐘就開始紅、發熱、痕,九秒九衝去用凍水洗走,但都Last左幾個鐘塊臉係紅同痕的!!個幾個鐘我係咁諗:我唔想食翻藥...嗚...唔好發丫...唔好!好驚好驚!!
    如我上文講,我都有得葉醫生面前喊,而家諗返真係想搵窿捐...再老實D同你講,係葉醫生面前喊都唔魚,我係丫皮膚科醫生A同B同家庭科醫生E面前都係忍唔住有喊到............哈哈哈哈。

    回覆刪除
  11. 能夠遇上一位知音人,真係好呢,可以shar 呢d野. 唉.有呢個病,真係咩都唔用得,用都要小心d呀 只好做多d運動令自己皮膚好d啦;(  喊都係正常,女仔係貪令架0麻  不過我就算唔再紅,都係有d豆豆印係度(之前搽佐果d 淚故純),側面睇搞到好似有一細達唔明顯既印係塊面度,真係有d驚唔能夠完全變番普通膚色
     
    [版主回覆03/09/2010 09:29:00]多做運動係好既,不過如果係發緊既時候就要小心,怕做運動會令塊面紅同熱,我記得果陣葉醫生有叫我唔好做太激烈既運動。
    有少少印唔緊要啦,上粉底就乜事都冇啦!最緊要唔好痕同熱囉!

    回覆刪除
  12. 睇過你這2篇文章,真的很感用身受,我有了這個病七年了,最初於03年發病的時侯,每次有一點焗和熱2邊臉就好紅好熱,好似畀火燒咁,有時又會有畀蟻咬的感覺(唔知你有無試過?),睇過無數皮膚科專科醫生,食過抗生素(因副作用太勁,人又水腫又嘔心頭暈所以放棄),又搽過藥膏(無咩作用),果時真係好低落好低落,成日喊,越喊又越紅,試過入一間boutique 一分鐘,塊面即刻紅哂。上網睇呢個病無確實成因和治本方法,唯一可以做的就是從日常生活習慣著手,包括你以上所講戒口事項同埋唔好去啲熱和焗地方,仲有,唔可以太緊張和大壓力,又唔可以唔夠瞓,有時連對電腦太耐和用手提電話太耐都會面紅.....最初真的很不習慣,但慢慢接受了這個現實了。近2-3年,我再加適當運動(家裡踏健身單車),以增強自己抵抗力,到現在,發紅的次數已減少了很多,但冬天的情況就會差一點,因為出入室內室地方溫差比較大和有些地方沒有開冷氣會較焗就會面紅,但相比起前早期發病,我現在已好多了。但我卻對你的治療成效很羡慕,因為你竟然一點紅也沒有!(我就算平時面頰也會有少少紅,開心大笑和情緒激動時都會滿臉通紅),而且你也仲會化妝,我不敢化妝呢!雖然化妝可以遮到臉紅,但我怕會更加會焗住啲皮膚,我又有諗過做laser 去打走啲顯眼的微絲血管,但我又怕會越做越差....你的成績真的encourage 到我地呢類同被呢個病折磨的朋友!
    我有啲問題想請教你:
    1)請問你用的Physiogel 的cream 和lotion 的全名,係咪夏天用lotion 冬天用cream?  我用咗Avene 4年多了,每請問你有無用過?
    2)請問你有無用防晒?我聽講呢個病防晒都好緊要,我用緊spf10咋,唔知足唔足夠呢?
    3)請問醫生有無同你講呢個病的成因?同埋點解要用抗生素醫呀?
    4)見你平時都只用水洗面(如果唔化妝),但你覺得乾淨嗎?我平時用spf10都用卸妝抺一次再用cleanser, 好似有點兒誇張,但我洗不淨啲lotion  會block 住毛孔。
    先謝謝你的意見!
    [版主回覆03/12/2010 11:35:00]>>每次有一點焗和熱2邊臉就好紅好熱,好似畀火燒咁,有時又會有畀蟻咬的感覺 當然有!!塊臉係成日覺得有頭髮掃過咁痕,但其實唔係!好難受,冇試過既人唔會知有幾難受! >>食過抗生素(因副作用太勁,人又水腫又嘔心頭暈所以放棄) 我都係水腫嘔心加頭暈,但我成日同自己講,唔忍左佢就唔靚,而且當時Dr. Yip既藥令我病情有明顯既改善,所以嘔死都要忍,肥死都要忍,回看當時既相,肥到似豬...而呢種肥就算停左藥都係肥,直到呢半年先冇。 >>又搽過藥膏(無咩作用) 醫皮膚既西藥,十之八九都係有類固醇,我當初就係搽有類固醇既藥搞到咁,Dr. Yip就話我既case唔好再用外用既藥啦! >>我有啲問題想請教你 唔洗客氣,我會盡我所能! 1)請問你用的Physiogel 的cream 和lotion 的全名,係咪夏天用lotion 冬天用cream?  我用咗Avene 4年多了,每請問你有無用過? 我上文都有連結,Physiogel Hypoallergen,一D都唔會難買,大少少既萬寧同屈記都有,我有聽過人用Avene好似話對敏感好好,但自己冇用過。Physiogel一講出黎所有醫生都會話:一定岩你用架啦!因為係專for我地呢d咁麻煩既皮膚用既。Yes, 夏天用lotion 冬天用cream,簡單d講係,覺得乾就用cream,冬天用lotion唔夠潤。
    2)請問你有無用防晒?我聽講呢個病防晒都好緊要,我用緊spf10咋,唔知足唔足夠呢? 我冇用...不過粉底有少少防晒度。不過呢,我病發時唔會比自己係太陽底下,哈哈...苦笑黎既。
    3)請問醫生有無同你講呢個病的成因?同埋點解要用抗生素醫呀? 幾個醫生都話係醫學上仲未有一致既說法,不過我睇左好多外國站,通常都有關個人既免疫力事;因為我仲有銀屑病(完左有玫瑰痤瘡之後既事),而銀屑病都係個人身體免疫力既問題,加上遺傳,所以,唉,我諗我天生係有少少問題。唔知點解用抗生素wor,我又冇諗過呢個問題wor,等我find out下先。
    4)見你平時都只用水洗面(如果唔化妝),但你覺得乾淨嗎? OK丫唔會覺得唔乾淨丫!呢個習慣係我有玫瑰痤瘡之後先開始有,因為發現每一次洗完臉如果係用洗面產品的話,會比冇用洗面產品時紅!!而且我洗面唔會摸到塊面,可以唔摸佢就唔摸,因為我又發現摸完會比唔摸時更紅!!所以結果就唔摸又唔用洗面產品。
    你的成績真的encourage 到我地呢類同被呢個病折磨的朋友! 我有病果陣(其實而家都有,有時都會覺得塊面會熱,你知啦,呢個病唔會斷尾架嘛!)成日會睇人留言,但我就冇見過人地話醫好,當時我好沮喪,真係好沮喪,覺得自己冇可能會醫得好;所以到我可以控制病情啦,就想出黎用我小小既力量比個好例子大家睇:醫得好架!唔好放棄丫!
    希望幫到你啦!希望你可以好返!

    回覆刪除
  13. 真的謝謝你..Miss K! 令我地俾玫瑰座瘡既人有返希望! 我都好明白個種感受...真係日日喊! 皮膚又乾,放親咩係塊面都紅&痕&腫! 身邊既朋友亦都唔會明白呢種感受! 真係唔知可以搵咩人傾...
    有次我病發去見工見搵工agency.. 個個人一入黎就問:你塊面攪咩ar? 當堂真係冇信心都冇曬! 臨走既時候仲叫我快D攪返店塊面,又話女仔個樣好重要,又話咁樣會好影響見工..等等之類既說話... 見完之後一出門口我真係忍唔住喊!
    我都睇過好多醫生...食左好多藥...食到身體都差曬... 又暈又胃痛.經期又唔好... 我宜家都睇緊中醫調理身體... 另外,我想問你又紅又癢既時候用咩方法至紅至癢ar? 因為我宜家仲用緊類固醇.. 我知道類固醇唔好,都搵唔到辦法,我真係好想停左佢....!!!
    點都好...真係多謝你既分享! 希望日後有咩問題都可以問你,同你分享la! 亦希望大家都可以保持心境開朗,齊齊好返!!
    [版主回覆04/12/2010 14:31:00]呢三點都可以舒緩紅同痕:
    在發病時,我會先把水放進雪櫃(非冰格,我怕太冰會凍傷皮膚),覺得臉太熱了就以雪水洗洗
    承上,也可買冰袋,用毛巾包裹以冷卻發熱的臉頰
    在辦公室上班的請留意自己的坐位會否太熱,我在桌上永遠有一把USB小風扇,吹著臉頰也舒服點
    >>病發去見工見搵工agency
    見工個果人咁衰,請你都咪做!!衰人!agent 公司如恆河沙數,搵過第二間!
    >>食到身體都差曬
    雖然我玫瑰痤瘡係好返,但都係身體差左...因為食抗生素,抵抗能力真係弱過以前,最大既徵兆係我開始有牛皮癣,係身體唔好既表現。不過算啦,醫得好一樣還一樣,一步步黎。
    希望你可以好返啦!^^加油!

    回覆刪除
  14. 謝謝你呀!! 牛皮癬?? 有醫生證明真係牛皮癬? 唔知你有冇聽過個中醫叫劉漢長? 聽聞佢醫牛皮癬ok gaa. 不過我自己未睇過佢~ 俾你參考參考laaaa..
    [版主回覆04/14/2010 08:57:00]嘩!劉醫師真係好紅!我係網上見到人地話佢ok所以去睇過佢!!但係因為地點同時間都夾唔到我所以冇再去lu...

    回覆刪除

  15. 天然鴯鶓油 Emu Oil 可以深入肌膚 可以提供肌膚最潔淨的滋養;舒緩各種皮膚過敏現象如:濕疹、牛皮癬、粉刺、及其他的皮膚狀況。
    而本店 的EMU OIL 手工皂, 能有效地治療濕疹 ,而 鴯苗油 可減少皮膚上的細線紋及皺紋,有效舒緩肌膚不適、能讓肌膚更年輕光滑,具有深入滲透及快速吸收的特性,舒緩安撫肌膚、增進皮膚更新;並含高品質的脂肪酸和多種肌膚所需營養素。滋潤保濕肌膚效果優異,不阻塞毛孔,讓肌膚更健康亮麗!

    Pure Emu Oil 對濕疹來說,它能止痕,殺真菌,潤膚,搽完pure emu oil 之後感覺会很舒服,是一種很有效的自然療法.短期內已有明顯療效 .
     

    如欲查看更多原材料可瀏覽:
    http://streams-natural.shopping.beautysky.hk/
    STREAMS NATURAL地址及電話:
    尖沙咀,加拿芬道41-43號,匯理商業大廈9/F,910室(金馬倫道銀生銀行對面)
    TEL : 8113 2181 CYAN 卓小姐
    以上是STREAMS NATURAL辛苦製作及分享,唔好轉載丫~THANK YOU

    回覆刪除
  16. 我同你一樣病症 , 簡直唔想見人 , 我又食過唔少藥同搽藥膏 , 又做美容同買護膚品 , 但都冇用 . 我想問你食邊種藥 ??
    [版主回覆04/26/2010 08:57:00]當時葉醫生開比我既藥我冇抄低藥名(不過就算抄左,都唔可能就咁拎去配...),去試下睇下佢睇佢幫唔幫到你,一星期藥約五百蚊。

    回覆刪除
  17. Miss K, 想問下你果陣時除左食藥外, 葉醫生仲有無俾藥膏你搽呀? 要搽幾耐先可以停?
    同埋想問下你, 會唔會在早上起身時會紅 d架?
    [版主回覆05/12/2010 10:34:00]冇藥膏,當時佢話我之所以會爆發,係因為我之前個醫生比類固醇我搽(黎醫敏感喎)所以唔會再比外用既野我。
    早上會冇咁紅,因為我開左冷氣,體溫比日間低,所以冇咁紅。

    回覆刪除
  18. 好奇怪 ... 唔知我係唔係在被窩暖凹凹的, 有時早上起身會有點面紅~~~
    但係夏天氣溫咁高, 在街上行一陣都熱啦, 怎樣避免體溫升高? 冬天室內好焗, 真係會焗到面紅啊~
    我前兩個月先有 rosacea, 所以唔係好清楚夏季同冬季的控制 ... 要請教下你了!!! 你現在還會容易面紅嗎? 有無做運動和戒口呀? Thanks so much!!!
    [版主回覆05/14/2010 10:10:00]可能係,你張被會唔會太厚,或襟到上頭丫??
    >>但係夏天氣溫咁高, 在街上行一陣都熱啦, 怎樣避免體溫升高? 帶扇,係咁潑係咁潑 !加上我好少出街,比起冬天,反而夏天既室內係仲凍的!
    我而家都會面紅,但係會正常咁消退;有做運動(一星期跑步4日,每次做1個鐘心跳達80%),有戒口掛,因為減肥所以都冇乜食過野...哈哈...

    回覆刪除
  19. 仲有呀 ... 你本身 skin type 係較乾 / 混合性 / 油??
    [版主回覆05/14/2010 10:10:00]混合性,T字油,面頰乾。

    回覆刪除
  20. 你覆得好快呀~ ^o^ 唉, 夏天就怕室外熱, 冬天就怕室內焗, 我諗起都擔心呀!
    我被 rosacea 整到個人好緊張和焦慮 (平時已經緊張架啦, 現在更甚, 哈哈), 成日怕焗怕熱怕面紅怕惡化, 唔知你果陣時又係唔係呢? 身邊的人都會叫我放開d, 醫生亦話情緒好影響病情 ..... 你果時點樣放鬆同埋調節情緒呀?
    [版主回覆05/14/2010 10:24:00]最難就係呢點,叫自己開心真係最難同冇人幫得到。係我成長既過程當中,我經歷過更大既挫折同難過,當我唔開心時我回憶果陣日子,就覺得咩都no big deal。
    皮相姐,我仲生存緊,冇咩大不了。

    回覆刪除
  21. 女仔總係貪靚的, 我見你在前篇都說, 看到自己那時的臉連上街的勇氣也沒有 ............ 我而家都叫自己放開d~
    你在那時段就係靠那個 "no big deal" 的思想去開解自己嗎?? 那個時侯有沒有打定輸數這個病會醫唔好, 反反覆覆?
    多謝你的分享!
    [版主回覆05/14/2010 11:00:00]係丫。而且叫自己信相個醫生,比耐性食藥,每一日做好每一日既功課。重點係,我相信我會好的,只係時間問題。
    其實到而家都覺得總有一日會覆發,所以唔敢鬆懈,一直都有注意唔好比自己熱。

    回覆刪除
  22. Miss K, 又係我啦~
    見你都有推介 physiogel cleanser ... 你覺得佢好用d 定係無印敏感肌潔面泡泡好用d 呀? 我個醫生叫我用 cetaphil (佢話怕 physiogel 對我來講會 lup 喎, 雖然我用過又唔係好覺 ...), 但係 cetaphil 其實有隻 SLS 的成份都對皮膚有刺激性, 所以我唔係好想用~~~ 而家我就用 aquanil cleanser, so far 都 ok 的, 你又有無用過呢隻呢??? 其實講成份的話 physiogel 就應該係最溫和果隻的~~
    話時話, 你而家會唔會都有生暗瘡 / 粉刺呀? 定係完全白白滑滑?
    你話果陣時要食左藥一個月後先開始控制到 ... 係控制到面紅定係 d 粒粒開始好番? 其實面微絲血管係唔係在好返後的初期都係會比較明顯? 要等佢自己慢慢先會無咁現架???
    最後, 想問下你隻藥 (抗生素) 係唔係起初日日食, 之後就減藥到隔日食?
    又麻煩你, sorry!!!
    [版主回覆05/19/2010 14:22:00]>>佢好用d 定係無印敏感肌潔面泡泡好用d 呀
    Muji,我都覺得physiogel既cleanser唔太有清潔到既感覺,不過我覺得油脂係有保護皮膚既作用,所以忍耐。
    >>aquanil cleanser
    冇喎,但你自己覺得無問題咪得囉。
    >>而家會唔會都有生暗瘡 / 粉刺呀?
    冇,只係有時太熱會覺得面痕,好似想番發咁,九秒九沖水洗面就冇事。
    >>控制到面紅定係 d 粒粒開始好番?
    粒粒收左水,仲有少少紅但係好好多,我微絲血管一直都唔會好明顯架喎,唔知係咪我面皮厚呢?^^||
    >>隻藥 (抗生素) 係唔係起初日日食, 之後就減藥到隔日食?
    係丫係丫!
    唔洗客氣!
     

    回覆刪除
  23. 咁你記唔記得 ... 隻藥減到隔日食之後, 再食左幾耐先完全停藥呀? Thanks! 
    [版主回覆05/19/2010 15:37:00]......唔記得,好似約兩個星期?

    回覆刪除
  24. 睇完你篇文章, 我真的很感同身受. 本人患了玫瑰痤瘡和脂溢性皮炎 (醫生說不能斷尾的),在這兩年間, 睇過很多中醫,西醫,美容院, 食過無數抗生素, 好番又翻發, 現在,服食緊異維a 酸差不多半年了.臉上已沒有暗瘡, 但經常臉紅 .令到情緒很低落和緊張, 我知這種病是因免疫力差而引發, 本人想跑步加強自己抵抗力, 但一跑步便臉紅, 那麼我可否做運動呢 ?
    [版主回覆11/08/2010 08:55:00]我記得當時睇葉醫生時佢提過唔好做劇烈運動。我覺得係現階段都係唔好狂跑住。
    或許你可以試下睇我上面提及過既葉醫生,睇佢幫唔幫到你。

    回覆刪除
  25. hi~之前我KEEP住用清水洗面好左D, 但呢排轉天氣, 用清水洗完, 塊面好乾同埋有一達達紅, 好似濕疹一團團紅左, 我用PHYSIOGEL LOTION都好似冇咩效, 唔知有冇方法解決? THX^^
    [版主回覆11/12/2010 15:59:00]用PHYSIOGEL 既AI CREAM,EVEN佢隻CREAM(正常果隻)都比LOTION有舒緩效果。

    回覆刪除
  26. 睇完你篇Blog之後好有同感!因為我都有呢個病,是今年十月開始的,已經接近兩個月了。因為我有個相熟的普通科醫生,以往發生奇難雜証都是由他轉介專科之後好翻的,所以今次一如以往被他轉介到專科 - 皮膚科。如果不是他,我也未必那麼快知道得了這個病。睇專科真係好貴,睇了三次已經二千五大元,不過花了錢,病情又確實有所改善,為了自己的面容也不得不花這些錢。
    我個皮膚科醫生都有開Physiogel Cream比我用,不過早排天氣不乾,我用了覺得有點"Lup",之後佢俾隻Physiogel lotion我,用過覺得很好。我去屈記買,但見到有分Physiogel AI Cream, Physiogel AI Lotion, Physiogel Cream, Physiogel Body Lotion, 我見醫生俾我個藥袋只寫著Physiogel Cream, Physiogel Lotion, 你知唔知 AI lotion 同 Body lotion 有乜分別呀?
    我個皮膚科醫生說不會同食物有關,並沒有叫我戒口,不過我自己戒了蛋、牛、鴨、鵝,因為試過吃了之後發得好勁。加上我本人不吃魚,真的不知道除了菜、豬、雞,仲可以吃什麼。屋企人每天都要為我的晚餐傷腦筋,也有埋怨我不吃這些不吃那些,事實不是我不想吃而是不能吃!
    還記得剛剛有"玫瑰"時,心情非常低落,又不敢化妝,怕化妝品會令皮膚更糟,連街都不想出。戒口後情況好了,現在快要兩個月,Keep住食藥塗藥膏,現在好了八成。好想快啲好番呀!
    [版主回覆12/14/2010 14:01:00]AI係敏感中時用的,可以舒緩。我本來都想買呢隻,但係諗諗下都係覺得唔好搞咁多,用最基本果款就算啦。
    對我自己黎講,最有效係控制體溫。冬天時記得別讓自己太熱!因為室內都會熱架!仲有唔好坐係火鍋爐側邊,都唔好架!Once塊面又紅左就好難先退到架啦。
    加油加油!!

    回覆刪除
  27. 我剛剛看完前篇同後篇, 我想講我同你好相似, 我塊面又係有玫瑰痤瘡, 個身最近有埋牛皮癬, 我d血都係紫紫地色, 我遲d都會睇劉醫師, 希望可以搞返好個身體, 我d抵抗力真係差到爆, 每日都好down.
    [版主回覆12/28/2010 08:55:00]血既濃度高既,真係真係要食清d先得,蔥蒜唔好食,肉類都唔好食咁多。
    我最近用紫雲膏黎醫牛皮癬,work!去yahoo拍賣買既,我覺得你可以試下喎!

    回覆刪除
  28. what u think; what u face2011年2月15日 晚上11:24

    睇完你前篇同後篇之後我真係好想喊, 喊係因為感動, 感動找到痊癒方法同可信醫生
    同你一樣, 我都有玫瑰痤瘡. 又係(聽人講)話中環有個皮膚醫生好掂 結果我去試... 等左成粒中, 見你兩分鐘, 咩都無講叫你走 該位醫生姓李. 開左好多類固醇藥膏比我搽.... 用左半年真係唔掂 好癢 好紅 好慶
    結果係朋友介紹之下, 我都去左睇葉醫生 初頭食四環素... 好左8 成 ,結果又覆發 最後佢開左 a酸比我食, 食左2個月 就好番喇 ... 但係開心既日子唔長, 我係2010年11月又覆發 之後我去左睇中醫... 唔得 而家 我又再係去搵番dr yip.... 我好擔心, 我每一次既覆發 係咪就愈難好番.. 睇到你既相好番哂 我真係好羨慕啊.. 希望他朝有日我都可以好似你咁好番 仲可以分享 ^_^
    [版主回覆02/17/2011 11:30:00]類固醇藥膏我就愈搽愈衰囉...葉醫生都幾信得過,唉,我覺得要開一個類似openrice既網站以對醫生們評分。
    你有冇諗過自己點解會覆發呢?好似我今日,有少少翻發,我好驚好驚,而家係咁用風扇吹等自己塊面cool down;我反省,可能係因為我因感冒而食左抗生素,亦可能前日食左好多蟹,亦可能昨天食左一包好紅色既零食(有色素),亦可能連續泡左幾日熱水浴。
    多謝你黎,我希望我個case可以比同病病友少少心得,少少希望,呢個係我寫呢篇文既目的。
    一齊加油啦,唔好令自己唔開心呀,唔開心會差d架。

    回覆刪除
  29. 好羨慕呀, 我都有玫瑰痤瘡成幾年, 不過早排都好過一陣, 但係依家又翻發, 激死我啦, 但係又唔想睇醫生, 因為我唔想食藥, 見到你篇文之後, 想問一問, 葉醫生淨係俾藥你食, 咁有冇俾藥你搽呀?
    [版主回覆02/25/2011 15:24:00]無丫。佢話我係類固醇誘發,所以唔搽。
    加油啦,唔好比皮膚熱同太乾,搽多d physiogel!

    回覆刪除
  30. 我個咀不停發炎 睇左三次西醫成個月都未好 我都想睇下葉醫生  但打去姑娘一句 ”掛號無位” 就cut我線><!!!
    [版主回覆02/25/2011 15:25:00]唔係架咁衰???
    我未試過喎!係我會walk in鬧8+1佢囉!!

    回覆刪除
  31. 我都唔知呀~ 我岩岩打既咋 我可能妟少少再也啦 係唔係Walk in一定無得睇?
    [版主回覆02/25/2011 15:31:00]嘩,真係要等到天荒地老都可能會叫你明天請早。

    回覆刪除
  32. oh 咁我唯有睇返之前個醫生 唉  我都好困擾 左成個月
    [版主回覆02/28/2011 16:04:00]但你睇佢睇唔好嘛唔係咩?

    回覆刪除
  33. 我今日晨咁早去左睇葉醫生了 掛左號都等左五六個呢~ 他真的很細心  希望快的好
    [版主回覆03/01/2011 08:44:00]係架,book左都要等一個鐘至九個字。
    試下佢囉,睇下佢夾唔夾你。

    回覆刪除
  34. 我冇用Physiogel Cream呀, 其實Aqueous Cream得唔得架?
    [版主回覆03/01/2011 08:43:00]Aqueous Cream我要黎搽身架喎,你唔覺得好笠咩?

    回覆刪除
  35. 請問葉醫生係咪開抗生素-四環素俾你食牙?
    [版主回覆03/29/2011 17:26:00]抗生素咋

    回覆刪除
  36. 你好!我在大約一個月前才知道自己有玫瑰痤瘡的問題, 之前其也醫生都淨係話我係皮膚敏感,令我一路掉以輕心, 直至近半年情況愈來愈嚴重, 之前的藥高對我已經冇作用, 於是轉看了屯門李卓鴻醫生. 他一看便說我不是皮膚敏感, 而是'紅面症',  完全解釋晒我塊面發生咗乜嘢事,雖然我覺得很煩惱, 但起碼我知道以後我有乜嘢要避忌, 唔會好似以前咁 盲中中,攪到自己病情惡化!(住屯門的朋友, 若有皮膚問題, 可以一試, 這醫生態度唔錯, 價錢也不太貴, 一星期藥五百幾元) 我吃了一星期藥後, 好彩今次暫時冇嘢, 不過我知道這病好易又番發, 因為誘因實在太多, 同理聽你說,有啲藥會令人肥腫, 我真係好擔心! (因我本身已經唔係靚過人, 同埋係肥咗瘦唔番個種, (塊面對女人嚟說, 真係第二生命!) Anyway, 很多謝你的寶貴分享, 好心定有好報的!
    [Kit Lam回覆11/23/2011 00:14:30]你地好呀!首先多謝Miss K,皮膚問題已困擾我三年,一直看過很多中西醫都只是"濕疹,敏感"等答案,直到見到這篇文我才知道真正病因,這分享實在太好了!!
    啱啱睇完李醫生,他睇完便話我係"玫瑰痤瘡第一期",佢直接我做彩光治療才可以斷尾,食藥只能治標不治本.但費用太昂貴所以我要考慮.最後他開了藥,輕量類固醇及面霜給我.
    請問你地有否考慮過做彩光治療呢(很擔心成效)?另外我見你話類固醇會令病情更嚴重所以我吾敢用.
    [版主回覆04/19/2011 08:45:00]係,會肥腫到變豬頭...不過都無法子,當塊面痕到有蟻咁,熱到發滾,所有其他既野都要放一邊。
    好高興你可以搵到岩自己既醫生丫!!我覺得藥個個都識開,但係係唔係夾到自己就係另一回事啦!
    呢個病真係跟一世!我而家都唔敢忘記自己有呢個病,我發現我食親抗生素(感冒時)就會差d,所以都一直小心亦亦咁面對。
    我地一齊加油啦!!

    回覆刪除
  37. 想請問食左藥後幾耐先唔再出粒粒呀, 我依家都食左兩個星期啦, 仲係咁出粒, 激死
    [版主回覆04/28/2011 09:56:00]起碼一個月啦。
    耐心耐心耐心!加油!

    回覆刪除
  38. Hello Sis, 網上無意中睇到你篇文 我同你一樣係玫瑰痤瘡 已經好幾年 都係去你Blog中提及既葉醫生到診斷出泥 開始一星期食抗生素 但佢建議我食a酸 請問一下葉醫生當時都是用同樣方法替你醫治嗎?
    [版主回覆07/18/2011 09:26:00]唔係丫,我食抗生素架咋。
    信佢啦,要相信個醫生先會好,比一個月時間佢囉!

    回覆刪除
  39. 你好呀, 我6月底用錯洗面後皮膚敏感, 一直都時好時壞, 面更長出幾粒小瘡呀!!我擔心係玫瑰瘡, 因敏感時都有搽類固純呢...我已經BOOK左你介紹既醫生,最快要星期4先有位呀!真係好難BOOK~希望黎醫生幫到我啦. 皮膚敏感真係好苦惱呀!> <
    [版主回覆08/17/2011 09:22:22]佢真係幾full,仲要呢book左去到都仲要等!以前等九個字,而家直頭叫你1個鐘後再黎過!好誇張。我希望你唔係呢個病啦,因為好鬼煩,不過我聽上去似敏感既姐,我個時係搽左足足一年類固醇加上我天生就係免疫力有問題。去睇下佢睇佢點講。返黎話我知喎!^^

    回覆刪除
  40. 是葉醫生才對..HAHA!

    回覆刪除
  41. HELLO~上星期4終於見完DR IP LA.結果係佢話見唔到我有敏感, 係我搽得太多類固醇令皮膚變簿,擴張...我即時問係咪玫瑰痤瘡呀?佢就話未算係, 但都係要介辣,介熱,介酒,介運動..要吃3-4星期藥同比左CREAM我洗面....>< 但呢, 我食左幾天, 粒粒好像有增多了一點同皮膚好似好乾.唔知係咪正常情況呢????你個陣係咪咁KA?
    [版主回覆08/22/2011 12:06:59]都幾多人話食左藥會乾。我自己的話,我唔在乎乾唔乾,我只在乎仲痕唔痕!我記得我睇佢時,佢好似有同我覺有人會係初期多左粒粒都唔定,但係我本人的話就唔會囉。比兩個星期佢囉,都唔得就去找佢悔氣!哈哈

    回覆刪除
  42. 痕就好少痕. 其實係有好左既,無咁紅但粒粒多了..希望真係如佢所講,3-4WEEK LA..
    同埋真係唔可以激動.我琴日激動就馬上紅哂,出粒粒LA!><
    [版主回覆08/22/2011 14:04:32]情緒真係幾影響架!!咁出粒粒就唔可以單單話佢d藥囉。仲有m個排都影響幾大...加油,乖乖食藥,戒口,保持心情好!

    回覆刪除
  43. HI, 想問下你而+面仲會唔會易面紅面熱架??
    [版主回覆08/24/2011 10:09:10]唔會啦^^

    回覆刪除
  44. HELLO,昨天我到DR IP 覆診了.他說我的面紅現象比上星期好, 還減了我早上的止痕藥, 現在只吃中午的四環素+胃藥和晚上的抗敏藥, 我同佢講多左小粒粒, 甩皮同面乾, 佢話呢D都係正常反應, 因為花開花落WO!! 等佢D玫瑰全部謝哂就會好!!還說,近排太陽是我的敵人!! 因為我本身係無乜粒粒的,只係1撻仔紅同一兩粒紅疹(以前連暗瘡都好少會出), 一聽到佢話會愈來愈多粒粒,真係擔心要死LA!!> <
    [版主回覆08/29/2011 10:13:56]過左幾日有冇出多左粒粒丫?唔堅要啦咬一咬牙忍左佢,好快就變靚架啦!

    回覆刪除
  45. 好好彩,暫時粒粒無多到..只係甩皮同乾..希望甩哂D皮就會好返哂LA( DR.IP話會甩兩次皮) !!!!
    [版主回覆08/29/2011 14:47:45]試下用physiogel既cream,好厚好厚咁搽,可以軟化角質。

    回覆刪除
  46. MISS K~又係我啦..我想問下你食緊藥個陣你有無化妝呀??
    我地用邊d化妝品會比較好d!!
    [版主回覆10/05/2011 21:45:07]奇怪?我明明回覆左架喎!我病發時冇上妝丫,就算上都係上眼裝咋。我用植村秀既粉㡳囉而家,總之要上粉時就搽厚厚既phyciogel!!

    回覆刪除
  47. 我都係剛剛睇完醫生先知自己有呢個病。我食咗佢啲藥二三次已經冇咁癢冇咁紅同冇咁腫,加埋睇咗你嘅心得同經驗,我個人即刻鬆咗好多,開心咗,好多謝你呀。我覺得我係因為成日都同人比較令到自己唔開心所以谷咗呢個病出黎。所以我真係好同意心情對呢個病真係影響好大。希望大家都加油....不過我覺得版主好靚女同可愛啦...哈哈...
    [版主回覆10/05/2011 21:50:49]\(//∇//)\ 太客氣啦。。。咁幾好喎,食藥食兩三次就可以有改善,我當時食足兩三個星期先黎料。同人比較。。。唔,份量合當時會係上進既動力黎既,不過人既野又唔比較但咁多,特別有關天生個部就更加。。。加油啦,我都要睇開睇化。

    回覆刪除
  48. 你地好呀!首先多謝Miss K,皮膚問題已困擾我三年,一直看過很多中西醫都只是"濕疹,敏感"等答案,直到見到這篇文我才知道真正病因,這分享實在太好了!!
    啱啱睇完醫生,他睇完便話我係"玫瑰痤瘡第一期",佢直接叫我做彩光治療才可以斷尾,食藥只能治標不治本.但費用太昂貴所以我要考慮.最後他開了藥,輕量類固醇及面霜給我.
    請問你地有否考慮過做彩光治療呢(很擔心成效)?另外我見你話類固醇會令病情更嚴重所以我吾敢用.
    [版主回覆12/07/2011 10:36:48]huh我覺得...我會想食左藥試下得唔得先囉!而且我去睇時咪又係個個适一世不能痊癒,但而家我都ok無事喎!不過你問多另一個醫生既建議先啦!

    回覆刪除
  49. 我去睇過E生 佢都係話我玫瑰痤瘡 但係我面就冇粒粒野 只係面同NOSE 都好紅(NOSE比較紅)
    請問要點樣先可以唔紅啊><我已經介哂口 又唔俾自己焗..但係NOSE就紅左2年唔退
    [版主回覆02/16/2012 12:00:34]其實你做得好好架啦,會細心觀察自己做左d咩會面紅,咁你就唔好做呢d野囉。食面會紅我覺得可能因為味精!我試過有一次食左包薯片(紅色=有色素好勁,同有好多味精)就差d返發!所以我估係味精出事。乖乖地一陣,到冇咁勁先。我呢,以前(嚴重個陣)又係好似你咁冬天著短袖都唔凍!好返之後就試凍啦。
    [小明回覆02/16/2012 11:43:20]我依家都唔敢著多咖-,-係屋企著背心 出街著短袖...(我自己本身著成咁都唔凍既)但問題係 依家著短袖出街都會熱過頭>< 你個方法我會試試..謝謝你
    [小明回覆02/16/2012 11:31:02]仲有係食野...一食面就會紅..無論D野食熱唔熱..食都會面紅..唔知係唔係多人圍埋一齊食飯..焗焗地..搞到面紅紅 (另外...狂飲凍水 都會令2邊面冇咁紅..)一焗/熱..體溫上升番就會紅..依家訓先煩...一蓋被訓 第2日起身面就好紅了>< 唔蓋會凍咖MA
    [版主回覆02/16/2012 11:29:38]我個陣又係熱少少就紅架啦,所以係office凍天都吹風扇,同著少d衫。如果有效,咁你不如試下日日用凍水洗面啦!
    [小明回覆02/16/2012 11:25:08]咁又未試過 ;但係試過用好凍既水喉水 洗面同濕左D紙巾(夫)面 都會白左DD 冇咁紅 ..但一熱番小小就紅番
    [版主回覆02/16/2012 11:18:30]有冇試過用雪櫃雪過既凍水洗下塊面?會唔會立即見效?
    [小明回覆02/16/2012 10:58:17]我係女仔-_-用緊朋友AC; 我係打左次邊爐 就不停係鼻生暗瘡..(食左好多好多好多肥牛=.=) 之後就持紅唔退啦 ...依家就係2邊面同鼻都紅..不過鼻比較紅..我冇去私家睇(仲係學生 難付昂貴既費用) 去政府個D就話我係玫瑰痤瘡 成日叫我唔好飲酒=.=但係我都唔飲既....佢只係開左ROZEX俾我 但係冇用=.= 我依家一熱/情緒波動大 面同鼻就會紅起黎 焗又會紅...好想解決佢持紅唔退既問題><依家成日好似搽左腮紅咁 2邊面紅..鼻仲紅=.=
    [版主回覆02/16/2012 10:26:24]請問你係咪男仔呢?玫瑰痤瘡第一種係好似我咁面紅,但佢其實有第二種表像,亦係大家常叫既”酒糟鼻”,比較常發生係男仔身上。
    我係第一種,唔知我既方法對仔有冇效...咁e生點講?有冇開藥你食?

    回覆刪除
  50. 今日去左睇葉祺焜醫生,真係好FULL唔知係唔係星期1 ,佢話我係玫瑰痤瘡,開左1星期藥俾我,有4包藥分別係中午同晚上食2種藥 1次1粒...你個陣係唔係咁...記唔記得面只係小小紅要食幾耐抗生素?同埋我想問..睇一次佢係唔係只係俾一星期藥咖?因為睇1次$540 得1星期藥><我係個學生好難負擔下~~ 講開又講 好奇怪訓前會NOSE紅...起身會面紅=.=| 依家面上多左好多細細粒粒既野...紅就唔係好紅../-\唔知幾時好番呢
    [版主回覆03/02/2012 15:28:55]我食緊藥個排幾本上都冇咁紅架啦,一早就唔紅到放工時會紅,再一早唔紅放工紅咁一個cycle。
    肉好多毒素架,少食為妙,就算而家我無發病,都少食咯。
    [小明回覆03/01/2012 10:55:17]我依家咩都唔係好敢食...出街都唔知食咩好...通常有牛同煎炸既..壽C都唔係樣樣食得|| 三文魚都唔係好敢食..因為聽講話有呢個病紅肉都要少食 , 我依家一係唔紅咁(面得DD紅..唔細心睇都唔係好睇得出) 但係一紅起黎 就紅過唇好得人驚..你之前係唔係咁咖-,-?
    [版主回覆02/29/2012 10:13:28]佢就算有book都要等一個鐘咁濟!食抗生素都食左四個月咁濟。我開初食好大架,後尾先係一早一晚。我估要睇d藥係咪能夠控制到你既病情,可以既咪早d唔洗食囉!

    我好明白你既苦況。想當年我其實一早就有面紅同細粒細粒,但係因為無錢而唔睇醫生唔理佢;一直等到我而家公司有得claim保險,其實都唔係全claim到架,但叫做好好多,先長期睇醫生食藥醫好佢。或者...你同葉醫生傾下有冇法子啦!so far我覺得佢ok好人既...

    回覆刪除
  51. Miss K
    睇完你寫既玟瑰痤瘡文章我好感動,因為真係好難揾倒同病相連而又肯分享感愛既人...我都有玟瑰痤瘡,已經年多,但因為以前,講緊廿年前有過暗瘡同敏感,可能搽得類固醇多,皮膚比較薄,所以一紅就好有深有淺咁.. 好難睇,剩係係面珠登,眼肚下面...我想問吓你係米呢六七年都無返發過? 你會唔會記得你果時食既藥名? 我真係睇過幾個所謂出名既皮膚科醫生,但都無乜效...我依家剩搽保濕同食抗敏藥... 好慘,好唔開心,唔想出街,連工都唔想返...
    [版主回覆03/02/2012 15:35:44]無錯,我無返發過啦!講真果句,我呢幾年健康左好多,自從控制病情之後,我因為減肥所以食得好清好清,清到而家有時食肉個陣,食到有肉味會作嘔,唔再咁鐘意食肉,唔會無肉不歡;而且我養成固定跑步既習慣,一星期要跑兩次以上。自食藥食到肥腫->停藥->食清左->加做運動,我瘦左十幾磅。講到底,呢一個係免疫力出問題既病,要從根本走改變自己既生活習慣。

    其實唔難架,你都試下咁做啦!光唔開心係解決唔到問題架!加油!

    回覆刪除
  52. 我都係玫瑰痤瘡一員, 有時想化下妝, 想問你用邊 shu 既邊隻粉底, 可吾可以介紹下, 有無用 base 打底? Tks a lot
    [版主回覆04/11/2012 21:37:13]放左啦
    [版主回覆04/02/2012 14:41:42]我遲d放張相上黎丫下

    回覆刪除
  53. 吾該哂你
    [版主回覆04/15/2012 20:05:15]唔洗客氣。

    回覆刪除
  54. 你好呀我依家都有睇緊葉醫生架其實,,睇左1個月到,我都問呢段時間(半年)係咪都係反反覆覆咁架???好d唔好d咁ga??? thanksss
    [版主回覆05/10/2012 10:24:15]睇左佢之後都唔算係反覆,luckily。

    回覆刪除
  55. 你好呀,MissK,我今年先15歲,但已經患上左玫瑰痤瘡。宜家食左一個星期藥,我想問下一個星期見唔見到效果架?同埋大概幾耐先有明顯ge效果啊?!
    [版主回覆05/14/2012 14:37:45]一星期真係好難講,我係知抗生素的,都食左三星期開始先覺得冇咁紅,到三個月先真正見效,而重點係我緊守戒口/用冷水洗臉/唔熱得唔喊得之類既十戒。

    回覆刪除
  56. 你好呀……搵緊玫瑰痤瘡d資料就見到個blog…因為呢幾個月塊面時不時都好痕尤其係面額……又有少少熱熱地…所以我今日都有去睇醫生…醫生話係玫瑰痤瘡…但我而家冇生粒粒…只係面額紅同好痕…尤其夜晚…即而家…忍得好辛苦…
    唉…
    我都唔知點算……
    [版主回覆05/25/2012 14:03:41]用冷水洗面會冇咁痕,同埋呢,係公司就開usb風扇仔吹面。
    唔好唔開心。

    回覆刪除
  57. Hi ~你好!
    我都有呢個病, 其實我十年前都有過,當時的心情同你一樣咁DOWN,可能我皮膚白,身邊啲人只會以為我白裡透紅,仲成日話我皮膚好,我聽到一啲都唔開心,我不知為了這癢/紅/熱幾咁頭痛,幾咁DOWN, 無事的人的確唔會明白我的煩惱,當時我也有看過葉祺焜,但自覺作用不大,後來我看了中醫,食左都有半年葯,皮膚先至好返好多,之後就無再睇佢了, 但還是會反覆的發作,時間耐了,自己都會放肆,鬆懈,最近發作得比較嚴重,皮膚變得越來越乾同薄,塊面出了很多乾紋又泛紅,還有 "孟住"的感覺,今天才看完醫生,唔知啲葯得唔得, 唉~呢個真係一個長久戰,亦十份打搫自信, 能夠搵到同道中人分享吓感受的確是舒服好多,恭喜你捱過了這段日子,希望你可以一路KEEP到,唔好在返發啦,共勉之
    [版主回覆05/25/2012 14:04:33]jade,我想請問一下你點解會返發既呢?

    回覆刪除
  58. 你好!見到你這篇文章時, 我真的想哭出來了! 有種終於有人和我同病相憐的感覺!因為我也是這樣!以前不懂, 以為是暗瘡, 浪費了很多很多金錢! 直至上年找到一位醫生告訴我是玫瑰座瘡, 當我知道這個是不能根治的病時, 我心情直下谷底!!哭也哭不出來了!!!我連續吃了十個月的藥, 那些瘡幾乎是沒有了! 中間停了一個多月, 又開始復發了, 但是面紅依然沒改善!!現在我還在吃藥, 臉還是紅的, 然後很容易出油!! 但我沒有你們所說的好癢???但眼睛很乾, 很不舒服!我該怎麼辦呢??我好辛苦! 我不想再吃藥了!!好痛苦!!
    請問你吃了多長時間藥? 還有吃的藥是什麼樣子的? 跟我的不知道一樣嗎? 還有那醫生每次收費是多少
    十分感謝!希望你能回答!
    [版主回覆06/16/2012 22:13:02]500藥錢先夠一星期咋!邊有咁平既皮膚醫生?一個月連診金大約三千左右啦。。。諗起都肉赤,好在公司有醫保,保唔足叫做止下血。
    夏天我用lotion。我冇左藥名啦
    [stephanie回覆06/14/2012 18:44:19]即系你一個月看一次, 每次拿一個月藥?即是每個月一千元?
    你用的那種面霜(Physiogel Cream)會不會好"笠"架? 同埋醫生開比你隻藥叫咩?我想看看跟我那雙是不是一樣?
    [版主回覆06/10/2012 20:50:07]出油問題,我當時都會呢!皮膚會好似有角質咁好厚。醫生會比一d洗面既野我(但老實講我冇用到),我就日日得閒就用冷水(係雪櫃既水)黎洗面,洗完有舒服d喎!
    我個位醫生一位診金都500,另藥錢就真係睇佢啦,去到後期我唔洗食咁多藥就唔貴,但坦白講,都要預500藥錢一星期架!十個月真係好長呢,我明白,我當時食藥都食左好耐,你都算係好有心機架啦。。。

    回覆刪除
  59. HI,我都係睇朋友BLOG先個有呢個TERM,我睇st teresa醫院專科呀醫生都無覺得我似 !而家先知咩事,我都唔係太嚴重住,Physiogel呢隻洗面,養和門診醫生都叫我用,我而家轉左隻皮膚科/ 激光中心果D 先SELL既敏感性同保濕用品,希望改善喇 !諗緊會唔會睇醫生食藥定等佢慢慢好 !ST teresa 果邊叫我停藥 (佢當我普通敏感醫,我驗埋血 ﹣怕係紅斑狼瘡)。而家找到咁多料我先知,。。。。個醫生擺明耍我 !
    [版主回覆08/09/2012 15:07:31]藥ONLY ,都食左四五個月呀。。。諗返都驚,食藥食到驚。
    [天蠍GG回覆08/09/2012 09:43:48]唔好意思想再問問,醫生比藥你食再加藥膏 ??D 藥食左幾耐 ??
    [版主回覆08/08/2012 10:31:28]其實真係唔係貴/名氣大,就係明醫!我之後夠係去中環個D好出名既醫生啦,根本呃飯食!所以呢,要搵到一個信得過又夾自己既醫生真的唔易。

    回覆刪除
  60. 你好,我都份有玫瑰痤瘡,睇左好多醫生,中西都有,好反覆咁好又差反。
    岩岩上網睇緊有無邊個醫生好啲。就見到你呢個blog...
    唉,本來皮膚好好,一下子不停爛面....好難接受,加油!
    [版主回覆09/14/2012 16:21:55]醫,就會好。同要戒口呀!

    回覆刪除
  61. 非常多謝你既分享呀! 希望你繼續keep住靘靚皮膚啦!!
    我而家都開始試緊你方法!!
    [版主回覆10/27/2012 11:21:48]加油啦,呢件事要多期咁做先有用的!

    回覆刪除
  62. hello , 我同你情況都係差唔多~
    我大約起1年多之前開始左邊面夾中間會紅會乾會一撻撻,而且會痕會生粒粒~
    敢就去睇不同醫生啦...都睇左幾個...到到睇旺角黃錫明醫生,佢開D藥再加藥膏比我查~
    情況係好左但係D紅印一停藥就出返晒黎,同埋我都知D藥膏有類固醇,但無法,只係敢樣KEEP住睇佢睇左成年都無用...我最近上網睇到葉醫生,敢我今日睇完佢又係話我唔係敏感..唔係暗倉,係玫瑰痤瘡...佢開左抗生素比我,但佢知我有查類固醇要等2星期後先食佢D藥...叫我唔好再查果D藥膏..話只會令皮膚越黎越薄~ 希望葉醫生可以醫得好我啦~我覺得自己並不是太嚴重啦...只係左邊面中間果個位成日會有粒粒同紅到一撻撻~
    [Ching回覆12/19/2012 12:20:51]http://www.ezrahomebeauty.ecrater.com/p/11076511/rosacea-cream

    之前像燒豬,我用了這個好了。

    回覆刪除
  63. 你好,我都係係一年前睇葉醫生,
    我都係朋友介紹去,我睇左佢4個月,前前後後使左過萬蚊,係嫁,當時真係覺得醫得好好,而醫生同我講既野同你提既一模一樣,咁我睇完4個月佢話我好返喇,但要KEEP住查藥膏半年,就唔會愎發!咁我之後半年都好用心照顧自己皮膚,用佢介紹既洗面同埋查藥膏!但查左半年藥膏再過多兩個月我就服發喇!我真係好灰!自從睇左佢之後我既皮膚變得好乾同出油,又更易敏感!而家瘡又出返黎,D印去唔到,最衰過之前!其實我想表達既唔係葉醫生唔好,而係睇西醫係會愈搞愈差!我從來都無係人地BLOG留言嫁,但今次睇完你個BLOG好緊張呀,好怕其他都係依個病既朋友跟我同你咁去睇醫生,所以拿拿林留言!一年前我覺得醫得好好都有諗過打BLOG鼓勵其他朋友去嫁,但最終懶得滯無打,亦都好彩無打!我未搵到醫好依個病既方法,但係真係希望大家唔好去睇西醫呀!!!希望你會睇到我個留言,剎得切車啦!!
    [版主回覆01/10/2013 22:20:39]多謝你留言。但其實呢篇文係3年前既,而我亦好返4/5年都冇病發咯。
    人人唔同啦我估,我好彩,佢醫好左我囉。

    回覆刪除
  64. 你好呀,miss k,看到你能完全康復,真係好替你開心架.其實我係上年十月做完彩光及食完大閘蟹後,無lala就發到成面都係(一向我都皮膚唔錯)當時心情都好低落,咁看中醫就話係風疹.點知反反覆覆都有發,咁我就搽左類固醇係d粒粒到,最初都好有效架.但有時無la la又起反...咁斷斷續續都成三個月.點知上個星期開始塊面好慶同好熱.咁我就諗住可能我平時化裝,米走去換左隻醫生牌子的洗面LAW.點知出事,第二朝起粒,慶及HOT,第二日走去看尃科,先知自己係ROSACEA . . .真係勁唔開心LAW.所以E家我唔錦再用類固醇LA,只採CREAM.但呢兩日又出反D紅粒,想問問你天氣好乾果時有無出粒粒架.同埋脫皮呢???
    [版主回覆02/04/2013 17:18:20]係。我仲會用冷水洗面,唔比自己熱,加食藥。
    [Sally回覆02/04/2013 16:35:52]MISS K,謝謝你回覆.我想問你d粒粒點退呢??是否要食藥控制住佢呢??
    [版主回覆02/04/2013 16:06:24]其實我而家算係完全好返,所有出粒粒同埋脫皮都冇啦。
    我用PHYSIOGEL得喎,你唔怕都試下用。

    回覆刪除
  65. 我剛剛去過葉醫生處看病, 他真是一位好醫生~~
    [版主回覆05/08/2013 16:42:06]嗯嗯.

    回覆刪除
  66. 我比你嚴重得很多,我面上的紅印已經有兩年沒退過,一直都在紅
    因為之前看西醫誤診以為敏感給我搽類固醇結果我搽了很久皮膚越來越薄
    看過兩個皮膚科醫生都不好想試一下你那位葉醫生
    聽說他是好像是中醫為什麼看很多人都說他給的是藥丸和藥膏呢?
    他到底是中醫還是西醫,想問看玫瑰痤瘡的診費是多少?
    [版主回覆05/08/2013 16:42:45]西醫來的,500以上,我好久沒去不太記得了。

    回覆刪除
  67. 你好! 我今天都去左睇葉醫生, 佢都開左ANTIBIOTICS 比我, 一共9粒。我想問下要食幾耐先有效? 我個鼻同下巴都好嚴重 :(
    [版主回覆05/08/2013 16:43:55]其實我覺得係咪有效都仲要睇你自己係咪有乖乖做足全套。耐心一點吧!加油!

    回覆刪除
  68. 多謝你的回答!
    照足你的做法,感覺好好,我現在冇紅,
    冇熱,冇癢,塊面白番晒,只是還會有少
    許粒粒,再戒薯片,應該會好番!
    姐妹們:係得架,只要真的戒口.是會明顯好轉,
    當然要耐心地看到一個好專科.
    [版主回覆06/26/2013 11:11:10]唔客氣。希望大家都睇到你既加油。

    回覆刪除
  69. 我都係睇葉醫生,情況同你相似,請問你食完藥皮膚會唔會好乾呀?我亁到甩晒皮,搽乜都唔得 >< 又紅,又亁
    [版主回覆06/26/2013 11:10:34]個隻physiogel既cream OOK架喎!唔好怕SIDE大大PAIR咁搽上去!

    回覆刪除
  70. 我都好似你咁, 比你更嚴重得多,最後的起心肝去睇, 食左一星期藥, 好返好多~~
    [版主回覆06/26/2013 11:10:45]恭喜!!

    回覆刪除
  71. 你好! 謝謝你的分享! 我依著你的照片買了這3樣化妝品,不過我有幾個問題想問,希望你會回答!
    1)你看葉醫生時,可否化妝呢? 他有沒有告訴你不可化妝呢?
    2) 照片上的三款化妝品是在病發期用,還是在痊愈了以後用呢?
    3)請問你病發期使用的清潔/洗臉用品是什麽呢?
    謝謝!!
    [版主回覆06/26/2013 11:11:30]係BLOGGER覆左。

    回覆刪除
  72. 葉醫生難唔難約?

    回覆刪除
  73. 都2014年了, 唔知仲有無人還被玫瑰痤瘡困擾呢?!....我上個月玫瑰痤瘡困擾複發, 第3 次複發了, 好唔開心, 對上一次玫瑰痤瘡複發巳是15年前, 可以話曾好幸運地病情被控制了有15年, 未想過會可以斷尾, 可以控制病情巳經好幸運. 又要作戰了, 真係唔想回憶第一次病發, 第二/三次複發都好痛苦.....現在醫療技術都有進步, 有無人做過光學醫療去控制玫瑰痤瘡呢? 分享下吧!

    回覆刪除
  74. 謝謝你的分享呀!

    回覆刪除
  75. 多謝分享,我也有這個病差不多3年了,看了好多中西醫.總結西藥見效快,不過覆發機會大,中藥就見效慢.我前前後後睇2年西醫,換左幾個醫生,一食藥就無事,一停藥就生返,特別M到會嚴重d.而且覺得副作用好大,身體越來越差,最後我停左西藥.停左西藥之後生得好勢利(瘡+面紅+癢),我朋友見到就介紹我睇中醫,第一個中醫,幫我針灸+藥粉,睇左3個月度,無咩效果,就無再繼續睇.然後就一直爛面爛左大半年,系機緣巧合之下,上年10月底睇左另外一個中醫.睇左2個幾月,期間食左好多藥,藥粉+煲藥.然後竟然慢慢就無再出瘡,同埋面無甘紅.依家已經停藥差不多2個月.觀察中.我覺得自己真系康覆左,所以想幫到更多嘎人,因為我知依個病真系令人好痛苦.最後我五想比人覺得我賣廣告.如果有需要的人就PM我啦

    回覆刪除
    回覆
    1. 請問你睇邊個中醫架?我睇左2個月西醫,情況一直好反覆,想睇中醫調理返個身體。唔該晒。

      刪除
    2. 你好, 請問你睇邊位中醫?

      刪除
  76. 你好,我想問下醫生有無叫你戒奶類製品?

    回覆刪除
  77. 你好 我都係玫瑰痤瘡,成年啦 食左1個月紅黴素,好唔翻,醫生要我食3-6個月四環素,我驚傷胃,請問你睇咩中醫?你有冇食四環素?唔該!!

    回覆刪除

隨機文章

Recent Posts