Related Posts with Thumbnails

Pages

2012年6月3日

最難回應的說話?




今天AM730的專欄有一則〈最難出口的說話〉,看後有感。
 
作者認為很多人覺得「唔該」是最難出口的說話,我很同意。我的同意並不是透過日常間有多少人向我道謝而來的,而是因我看著別人就「唔該」而作出的反應而來的。
 
哦哦,這可是很有趣的反應呢。
 
那天我因事向兩位站在一旁的警察問路,因為太匆忙,在他們回答後的一迅我忘記了道謝,直到向前走了兩步才回頭:「呀!唔該晒!」那兩位中年的警察叔叔一呆,不知作何反應只看著我,彷似我在告白、又或宣佈死訊的一臉難以置信。我突感蒼涼──到底有多久,問路的人沒有向他們道謝啊?
 
又例如清潔的姐姐。那天公司的清潔姐姐在幫忙的時候,我說「唔該晒!」,她頓時停下兩秒,之後裝作聽不到繼續工作。反正就是「這不可能啊」、「不能相信」的反應就對了。
看著對方這種反應,我就知道「唔該」在他們日常的生活中是有多罕有,也證明著作者所說,香港人平常還真的不太會說這句magic word。
 
不對不對,事實上我懷疑「謝謝」二字早於江湖上失傳已久。君不見,平日路邊大陸同胞問路時,有哪位──我真心問──有哪位會在問完路之後說個「謝」字?嗯,我真心問的。
 
 

19 則留言:

  1. 印像中,天朝人都間唔中有個講「謝謝」,反而香港人就。。。
    [版主回覆06/04/2012 11:43:45]係?我成日比人問路但就從未碰過。
    你可以去試下買六六彩。

    回覆刪除
  2. 謝謝你的唔該~
    [版主回覆06/04/2012 13:04:27]哈哈哈,我知道架。
    其實廣東語真係幾博學高深,唔係土生土長要學透都有難度架。
    仲有唔洗唔該。呀,我有幾耐無聽到”唔洗唔該”呢句野呢?
    [jokelib回覆06/04/2012 12:55:46]拖長個尾音, 唔洗~~~~~~~~~
    [版主回覆06/04/2012 12:46:59]唔洗會否rude左d呢?後面係咪要跟”受唔起”?
    [jokelib回覆06/04/2012 12:30:37]通常係答"唔洗", 不過已經係古早味的用語了...
    [版主回覆06/04/2012 12:26:49]唔洗客氣<--係囉,正常唔係答一句唔洗客氣就得既呢咩?唔係好難姐。

    回覆刪除
  3. 可能是忘記. 久了"忘記"變成了习慣. 久了"习慣"使过路人和旁人認為"唔該"變成"应該"不用了. 其实記在心中, 把"唔該"再一次變成一个好"习慣"是必要之礼那不就得了嗎.
    [版主回覆06/04/2012 14:28:59]呀!唔該晒!
    [版主回覆06/04/2012 14:28:39]勁人,認到泰文!
    [jokelib回覆06/04/2012 13:20:45]泰文
    [版主回覆06/04/2012 12:31:26]唔該請問貴站那拼音般的語言是那國文體?

    回覆刪除
  4. "唔該晒" 我成日聽到, 有時仲覺得一句唔該駛死人 ^^
    [版主回覆06/04/2012 14:30:56]咁客觀黎計,聽到唔洗客氣既頻繁少過唔該好多咁喎

    回覆刪除
  5. 哈哈~我又諗番起d舊野, 以前睇戀愛世紀阿木村成日講3 9, 咁又學多樣日本嘅語言文化。
    [五島回覆06/12/2012 01:06:21]戀愛世紀有一幕木村係office用紙寫3 9比松隆子做埋個表情唔該, 太耐囉, w就睇山p套善終人生, 佢同榮倉奈奈加警部前輩一齊去食炸豬果幕囉。
    [版主回覆06/10/2012 20:26:32]係邊學到?
    唔該仲好D,但唔洗唔該就真係仲難聽到。
    [五島回覆06/07/2012 01:15:50]哈~今日又學多樣, 原來W即係雙重, 有趣。

    回覆刪除
  6. 可能真係比外國文化感染. 我返香港會成日同人講唔該/thank you
    [版主回覆06/10/2012 20:26:28]的確。我甚至會微微鞠躬。

    回覆刪除
  7. 我每早都會聽到「唔該」這句說話,是我在未有任何動作之前,就是在擠迫的地鐵車廂內,落車乘客不斷重複的「唔該借歪」這句。
    [版主回覆06/10/2012 20:28:27]算唔錯,雖然明明冇位都要"借",有時仲係明明自己都係呢個站落都係要借,起碼有唔該,不少陸客連呢句都惜字如金,直接炸出去。
    [心弦回覆06/08/2012 21:30:47]哈哈,這也是我常聽到的。

    回覆刪除
  8. 唔該
    [版主回覆06/10/2012 20:28:41]唔洗客氣

    回覆刪除
  9. 我經常都會向服務我o既人講「唔該」,是否不正常?XDXDXD~~~
    [版主回覆06/10/2012 20:29:05]咁佢地有冇反應?係咪發現冇反應既多呢?

    回覆刪除
  10. 我一定說「謝謝」,作為禮儀的一部分~:D
    [版主回覆06/10/2012 20:29:27]唔該直頭係我口頭禪!

    回覆刪除
  11. 江南第一才子2012年6月6日 下午6:43

    「唔該!」有!我成日聽到,「唔該你唔好阻住晒!」,「真係唔該晒喇!」等等!
    [版主回覆06/10/2012 20:29:44]哈哈哈,咁你咁回一句唔洗唔該囉!

    回覆刪除
  12. THANKS MISSK , 多謝你的到訪! 特來道謝. 加油呀 ! ...... 我一定會講"唔該" 的.....這是我的口頭禪....
    [版主回覆06/10/2012 20:30:21]啊,咁眼利比你發現我去過添!
    唔洗客氣,亦請以後多D黎。

    回覆刪除
  13. 唔該前唔該後的日子不見了. 但是要還記得的人真心說下去. 社會才不致變成沒有感恩的冷漠社會.
    [版主回覆06/10/2012 20:32:18]感恩之心的確好重要呢!講到呢度就要鬥,到底係感恩之情持久D,定係終有一日會比社會既冷漠所洗脫呢?

    回覆刪除
  14. 只要對方真的想幫我的時候,無論結果是否我想要的,我還是會真心講「唔該」。
    [LIV CHAN ^_^回覆06/12/2012 16:17:02]me too!

    回覆刪除
  15. 多謝分享,我有不少學生也不喜歡說「唔該!」,他們總覺得這是一件難以啟齒的事,總覺得說後便是蝕底,初時我也很氣憤,也沒有想過他們會改,但慢慢想,就覺得他們在人格上的發展也是我該注意的,所以對他們說教了,他們也開始有改善,希望他們持之以恆:)
    [版主回覆06/10/2012 20:36:17]對啊到底為何會有人覺得唔該是難之啟齒的呢?明明一句唔該係可以洗死人架嘛!

    回覆刪除
  16. 我好鐘意講「唔該」,呢2個字其實好好用,可以令氣氛和諧d

    回覆刪除
  17. Stanley Lee 小丹2012年6月8日 晚上7:10

    這個分享有同感,唔該哂!
    [版主回覆06/10/2012 20:35:47]唔洗客氣

    回覆刪除
  18. 非常認同!
    我跟我的老外老公,每次其中一方煮完飯,吃飽後一定會很隨心地跟對方說"thank you for cooking!"
    但換了中國人社會,將同一句說話譯做中文,那就變成了最難說出口的事情。
    [版主回覆06/10/2012 20:37:27]等等等等,咁講完呢句,會唔會自動波洗碗先?!

    回覆刪除
  19. 上月我回港遊時我在街上向一報販問路,她連回話也不答,只是手指便算,所以對你說的非常有共鳴! 相反地"多謝"這两個字只會機械化地出現在食市或服務行業人員口中。

    最難回應的說話? Thank you ) :
    [版主回覆06/10/2012 20:39:31]哦哦,絕對明白你既情境,的確係有一種報販好唔鐘意答人野架!阿婆黎既?好似怕一答就會比人迷暈/搶刧/綁架咁。

    回覆刪除

隨機文章

Recent Posts